Seadh! An cuala sibh mu Chruinneachadh nan Iol-chainnteach?
'S e Cruinneachadh nan Iol-chainnteach an tachartas eadar-nàiseanta as motha san t-saoghal do dh'iol-chainntich agus don fheadhainn a tha fìor dhèideil air cànanan agus thathar ga chur air dòigh gach bliadhna aig deireadh a' Chèitein. Tha an tachartas air leth seo loma-làn de dh'òraidean is taisbeanaidhean sgoinneil, tachartasan cultarach inntinneach, agus prògram sòisealta spòrsail. Agus dè an rud as fheàrr? Is ann mu chànanan a tha a h-uile càil!
Rè an tachartais, bidh com-pàirtichean a' sgaoileadh a' ghràidh a th' aca air cultaran is cànanan is bidh iad gan cleachdadh, a' com-pàirteachadh ghliocasan is eòlasan, agus as cudromaiche buileach a' cur gu feum iomadh cànan airson deasbad, èisteachd, ionnsachadh, is ri mire an cuideachd a chèile. Luchd-ionnsachaidh, tidsearan, luchd-ùidh, luchd-tòiseachaidh, proifeiseantaich, luchd-saidheans, luchd-foghlaim, tha Cruinneachadh nan Iol-chainnteach an seo dhuinn uile! A bheil sibh deiseil a dhol an sàs ann?
Ann an 2021 bidh Cruinneachadh nan Iol-chainnteach air loidhne airson an dàrna trup!
Chumadh ciad Chruinneachadh nan Iol-chainnteach ann am Berlin, sa Ghearmailt ann an 2014-2016, agus an dèidh sin Brataslàbha, Slobhàgia ann an 2017-2019, agus, mu dheireadh, chumadh dreach air loidhne den tachartas seo ann an 2020 air sgàth galar-sgaoilte COVID-19. Am-bliadhna faodaidh sibh fiughair a dhèanamh a-rithist ri Cruinneachadh nan Iol-chainnteach Air Loidhne 2021, a-rithist air An Cèitean 20-23, 2021!
Fuirichibh, an e nach gabh Cruinneachadh nan Iol-chainnteach àite ann an Teresin, sa Phòland am-bliadhna?
Gu mì-fhortanach, cha ghabh: tha an galar-sgaoilte COVID-19 fhathast a' dol agus cha bhiomaid deònach sàbhailteach ar com-pàirtichean a chur ann an cunnart le bhith a' cur air dòigh a leithid de thachartas mòr eadar-nàiseanta aig an àm dhoirbh seo. Ged a bu mhòr gum bu toil leinn ur faicinn uile beò, feumaidh sinn a dhèanamh an-ath-bhliadhn', oir tha Cruinneachadh nan Iol-chainnteach ann an Teresin, sa Phòland air a chur an dàil don Chèirean 2022.
An do cheannaich sibh bileag mar-thà do Chruinneachadh nan Iol-chainnteach 2020 sa Phòland (mus deach a chur an dàil) agus an tug sibh sin thairis gu 2021? Nach sibhse a tha fortanach! Chan ann a-mhàin gun dèan sin a' chùis mar bhileag do Chruinneachadh nan Iol-chainnteach 2022, ach gun dèan i a' chùis mar bhileag do Chruinneachadh nan Iol-chainnteach Air Loidhne 2021 gun chosgais a bharrachd. Nach toir sibh sùil sa phost-d agaibh airson barrachd fiosrachaidh.
Dè thuirt na com-pàirtichean an-uiridh?
Dh'atharraich Cruinneachadh nan Iol-chainnteach mo shaoghal. Roimhe cha b' aithne dhomh ach mi fhèin a bha cho dèidheil air cànanan ionnsachadh agus, ged a bha taic mo charaidean agam sa chur-seachad seo, cha b' urrainn dhomh bruidhinn riutha ann an da-rìribh mu dheidhinn (agus ann an!) caochladh chànanan. Chuidich a' choimhearsnachd mhìorbhaileach seo mi ann a bhith a' tighinn gu tuigse nas fheàrr dhiom fhèin, thug i dhomh na dusanan de dhlùth charaidean fad-beatha agus 's ann a chuidich i mi ann a bhith a' cur air bhonn gnothachas soirbheachail le cànanan. Trobhadaibh is gabhaibh pàirt còmhla rinn!
Tha Cruinneachadh nan Iol-chainnteach a' comharrachadh gu fàilteach cho aighearach 's a tha e a bhith ag ionnsachadh chànanan. Cluinnidh sibh òraidean misneachail, togaidh sibh gliocasan feumail, agus bidh cothrom agaibh ur n-ùidh a com-pàirteachadh le caraidean seann is ùr. 'S e aon de na bàrr-phuingean agam ann am bliadhna ionnsachadh chànanan.
Bidh mi a' frithealadh Cruinneachadh nan Iol-chainnteach gach bliadhna. Ann an 2020 chòrd e rium gu mòr bruidhinn ri caraidean seann is ùr aig an dreach air loidhne. Tha fiughair orm ri bruidhinn ri luchd-ùidh chànanan a-rithist am-bliadhna!
Tha buaidh mhòr aig Cruinneachadh nan Iol-chainnteach, an dà chuid an làthair agus air loidhne, air mo bheatha. Tha e dìreach sgoinneil a bhith cruinn còmhla ri daoine às gach ceàrnaidh eadar-dhealaichte a tha na h-aon ùidhean aca is a tha a' brosnachadh càch a chèile, ge b' oil le cia mheud cànain a tha thu a' bruidhinn. An-uiridh, chaidh an cruinneachadh air loidhne thairis air na bha mi an dùil, agus tha fadachd mhòr orm ri sin a-rithist am-bliadhna - tha ag èisteachd ri òraidean fìor inntinneach, a' tachairt ri seann charaidean ann an seòmraichean cleachdadh chànanan agus a' coinneachadh ri caraidean ùra ann an gnìomhachdan sòisealta cuid a dh'eisimpleirean de na tha cho cudromach dhomh a thaobh Cruinneachadh nan Iol-chainnteach.
Ceud taing dhuibh às an tachartas seo a thoirt air loidhne. Lorg mi an ùidh mhòr agam ann an cànanan o chionn faisg air 10 bliadhna agus tha mi air bruadrachadh air pàirt a ghabhail ann an co-labhairt iol-chainnteach fad bliadhnaichean a-nis. Leig an t-ùrlar air loidhne leam pàirt a ghabhail. Tha mi air mo dhòigh glan leis mar a dh'èirich gnothaichean agus tha fadachd orm ri pàirt a ghabhail (an làthair) san àm ri teachd.
Taing ana-mhòr airson an tachartais seo! Cha robh mi riamh aig tachartas a b' in-ghabhalta - daoine às na tha sin de dhùthchannan aig iomadh aois a' bruidhinn an t-uabhas de chànanan! Tha mi toilichte gun robh an cothrom agam pàirt a ghabhail mar aoigh agus mar neach-labhairt agus tha fadachd mhòr orm a-cheana ri Cruinneachadh nan Iol-chainnteach an-ath-bhliadhn'!
Ceud taing dhuibh às an tachartas a chur air dòigh air loidhne; bha e mìorbhaileach, bha mi am beachd gun robh mi air fìor dhachaigh a lorg, agus dh'ionnsaigh mi an t-uabhas!
Bha e iongantach cho math 's a bha an cruinneachadh air loidhne seo air a chur ri chèile. Tha mi taingeil às an ullachadh is obair chruaidh uile a bh' agaibh. Bha fadachd orm ri bhith an làthair aig Cruinneachadh nan Iol-chainnteach fad bliadhnaichean, agus an uairsin thug sibh gu buil e. Taing mhòr!
Dè dh'fhaodadh a bhith romham aig Cruinneachadh nan Iol-chainnteach Air Loidhne am-bliadhna?
Tha sinn toilichte gun do dh'fhaighnich sibh! Tha sinn ga thuigsinn, nach eil e gu tur ionann Cruinneachadh nan Iol-chainnteach a bhith ann agus gun a bhith comasach air na h-iol-chainntich eile fhaicinn beò. A dh'aindeoin sin, tha fhios againn cho cudromach 's a tha e do na com-pàirtichean againn a bhith a' cruinneachadh gach bliadhna is ag ionnsachadh bho chàch a chèile, agus sin as coireach gu bheil sinn airson togail air tachartas an-uiridh le bhith a' dèanamh pasgan iomlan à Cruinneachadh nan Iol-chainnteach Air Loidhne 2021 làn de dh'eòlasan cànain air loidhne air leth!
Taisbeanaidhean tlachdmhor
Dèanaibh deiseil togail fhaighinn bho dh'iol-chainntich air feadh an t-saoghail a bhios a' com-pàirteachadh an cuid eòlais le bhith a' toirt seachad òraidean bheò ann an iomadh cànan mu raon ana-mhòr de chuspairean ceangailte ri cànanan. Co-dhiù a bheil sibh airson cànan sònraichte a rùrachadh gu domhainn, gus ionnsachadh mu na diofar dhòighean san ionnsaichear cànanan, bidh òraidean smodaig gu leòr ann a dh'fhaodas sibh taghadh.
Aon uair 's gu bheil na h-òraidean beò seachad, faodaidh sibh coimhead orra a-rithist cho tric 's a thogras sibh fad 1 mhìos an dèidh deireadh Cruinneachadh nan Iol-chainnteach Air Loidhne 2021. Abair sgoinneil!
Seòmraichean cleachdadh chànanan
A bu toil leibh ur cuid Fraingis, Gearmailtis, Innd-Innsis, no Swahili a chleachdadh? Tha cothrom ann dhuibh! Tillidh na seòmraichean cleachdadh cànanan mòr-chòrdte aig Cruinneachadh nan Iol-chainnteach Air Loidhne am-bliadhna agus thèid agaibh air raon farsaing is beòthail de chànanan a chleachdadh tron tachartas air fad còmhla ris na h-iol-chainntich eile. 1 chànan, 1 uair a thìde, 1 shèomar, dìreach taghaibh is siuthadaibh!
Prògram eugsamhail
A bharrachd air na h-òraidean, tairgidh Cruinneachadh nan Iol-chainnteach Air Loidhne 2021 tòrr ghnìomhachdan spòrsail a bhuineas do chànanan agus faodaidh sibh am mealtainn le bhith a' coimhead no a' gabhail pàirt annta. Aig a' char seo, tha tòrr iongnaidhean air leth san amharc dhuinn, mar sin cùmaibh sùil a-mach oir bidh sinn a' foillseachadh mion-fhiosrachadh sònraichte mar a thèid gnothaichean air adhart.
Tachartasan sòisealta is cultarach
Nach gabh sinn spòrs còmhla is aithne a chur air càch a chèile ann an àrainneachd ioma-chànanach! Bha Cruinneachadh nan Iol-chainnteach daonnan mu na daoine agus mu bhith a' faighinn tlachd às an eugsamhlachd de chùl-eòlas, cultar, agus gu dearbh cànanan againn. A dh'aindeoin 's gu bheil a h-uile càil a' tachairt air loidhne san t-suidheachadh làithreach, bheir an tachartas seo oirbh eadar-obrachadh le daoine eile is leigear leibh a bhith a' faireachdainn na h-àrainneachd iol-chainntich aig an ìre as motha.
Pàirt a ghabhail ann an coimhearsnachd iol-chainnteach
Tha a' bhuidheann bheòthail againn an gnìomh mar-thà air Telegram, agus bidh sin fhathast fosgailte tron, agus an dèidh, Cruinneachadh nan Iol-chainnteach Air Loidhne 2021. Airson daoine eile aig a bheil na h-aon ùidhean agaibh fhèin, agus is dòcha beagan aithne a chur air càch a chèile ron Chruinneachadh? Airson conaltradh ri chèile tro na seiseanan, feuch cò tha ri cùisean eadar-dhealaichte fhad 's a tha na seiseanan co-amail ann? Airson leantainn oirbh a' conaltradh leis an luchd-aithneachaidh is caraidean ùra agaibh an dèidh làimh? Mas e "tha" an fhreagairt, seo far an gabh sin dèanamh!
Teisteanas frithealaidh
Gheibh gach com-pàirtiche teisteanas frithealaidh tron phost-d an dèidh an tachartais. Seallaibh gu moiteil e san sgoil, oilthigh, àite-obrach no don t-seanmhair no ogha agaibh!
Cò tha a' cur an tachartais seo air dòigh?
B' iad stèidheadairean an tachartais agus luchd-eagrachaidh nan ciad trì eagran ann 2014-2016 Judith Meyer, Chuck Smith agus Martin Sawitzki. An dèidh sin, ghluais Criunneachadh nan Iol-chainnteach à Berlin sa Ghearmailt gu Brataslàbha ann an Slobhàgia agus thathar ga chur air dòigh bhon uair sin mar bhuidheann neo-phrothaide Education@Internet (E@I), agus Peter Baláž mar phrìomh neach-eagrachaidh an cois le buill eile sgioba sònraichte na buidhne de dh'iol-chainntich is luchd-eagrachaidh.
'S e sgioba eadar-nàiseanta a th' ann an Education@Internet (E@I), a bhios a' toirt a-mach phròiseactan air loidhne agus a thàinig gu bith an toiseach ann an 1999. Air sgàth eòlas an sgioba, chuireadh E@I air dòigh reachdail ann an 2005 mar bhuidheann òigridh neo-phoilitigeach is neo-riaghaltasach.
'S e a tha fa-near do E@I ach saoghal ann an co-sheirm agus sìths, anns am bi gach saoranach a' conaltradh air feadh an t-saoghail le soirbheas is luaths.
Thathar a' toirt a-mach gnìomhachdan na buidhne seo ann an co-rèir ris an amas seo, agus le cuideachadh bho bhuidhinn eadar-nàiseanta de shaor-thoilich. Am measg nan tachartasan seo tha cur air dòigh is cumail taic ri pròiseactan a bhios a' sgaoileadh cho cudromach is feumail 's a tha conaltradh eadar-nàiseanta gun bhacadh.
Ma tha obair na buidhne seo a' còrdadh ribh a thaobh Cruinneachadh nan Iol-chainnteach agus nam bu toil leibh cur ri coileanadh a gnìomhachdan, nach beachdaich sibh air taic airgid a thoirt dhi gus cuideachadh le bhith a' dèanamh cinnteach gum mair a pròiseactan.
Leanaibh Cruinneachadh nan Iol-chainnteach air meadhanan sòisealta airson am fiosrachadh as ùire fhaighinn.